குருவார_சங்கடஹர_சதுர்த்தி #சங்கடம்_தீரும்_சந்தோஷம்_கூடும்.*

 

சதுர்த்தி திதி விநாயகருக்கு மிகவும் உகந்த நாளாகும். சுக்ல பட்சம் (வளர்பிறை) சதுர்த்தியை வர சதுர்த்தி என்றும், கிருஷ்ண பட்சம் (தேய்பிறை) சதுர்த்தியை சங்கடஹர சதுர்த்தி என்றும் கூறுவார்கள்.

ஸ்ரீ விநாயகப் பெருமானை தேய்பிறை சதுர்த்தியில் வழிபாடு செய்வது மிகப்பெரும் நற்பலன்களைத் தரக்கூடியது. சங்கடம் என்றால் இக்கட்டு, தொல்லைகள், கஷ்டங்கள், தடைகள் என்று அர்த்தம். ஹர என்றால் நீக்குவது என்று பொருள்.

வியாழக்கிழமைகளில் வரும் சங்கடஹர சதுர்த்தி மிகவும் சிறப்பு வாய்ந்ததாகும். இதை குருவார சதுர்த்தி என்று அழைக்கின்றனர்.

குருவார சங்கடஹர சதுர்த்தி என்பது ரொம்பவே விசேஷம். இந்தநாளில், விநாயகர் அகவல் படித்தும் பூஜைகள் மேற்கொள்ளலாம். மாலையில், அருகில் உள்ள பிள்ளையார் கோவிலுக்குச் சென்று ஆனைமுகனைத் தரிசிப்பது நன்மை பயக்கும்.

இந்த நாளில், அருகில் உள்ள விநாயகர் கோவிலுக்குச் சென்று, அபிஷேகப் பொருட்களை வழங்குங்கள். விநாயகருக்கு வஸ்திரமும், அருகம்புல் மாலையும், வெள்ளெருக்கு மாலையும் சார்த்தி பிரார்த்தனை செய்யுங்கள்.

சங்கடஹர சதுர்த்தி நாளில், ஆனைமுகனைத் தரிசித்து வேண்டிக்கொண்டால், கஷ்டங்களும் நஷ்டங்களும் காணாது போகும். வாழ்வில் உயர்வு அனைத்தும் தந்தருள்வார். காரியத்தடைகள் விலகும். நினைத்ததை எல்லாம் நிறைவேற்றித் தந்தருள்வார் ஆனைமுகத்தான்.