🚩🔯#பஞ்ச_குரோச_தலங்கள்_என்பது_என்ன🔯🚩

 ஏழ்மையானோர் காசிக்கு சென்றுவர வசதி இல்லை என்பதற்காகவே உருவானவை பஞ்ச குரோச தலங்கள் எனப்படுகின்றன. குரோச என்பதற்குக் காசிக்கு நிகரான என்று பொருள். தேவர்களுக்காகத் தோன்றிய அமுதக்குடத்தை மானுடர்களும் பயன்பெற எண்ணி அம்பெய்தி உடைத்தார் ஈசன். அவ்வமுதம் பல்வேறு இடங்களில் ஐந்து குரோசம் வரையில் பரவி ஐந்துதலங்களை உண்டாக்கியதால் “#பஞ்ச_குரோச_ஸ்தலங்கள்” எனப்படுகின்றன. ஒரு குரோசம் என்பது இரண்டரை நாழிகையில் கடந்து செல்லக் கூடிய தூரமாகும்.

பக்தனின் நெல்லுக்கு வேலியிட்டுக் காத்த திருநெல்வேலியில் 25கி.மீ தொலைவிலேயே காசிக்கு நிகரான இந்தப் பஞ்சகுரோச ஸ்தலங்களும் அமைந்துள்ளன.

#சிவசைலம் – சிவசைலப்பர் கோயில்

அம்பாசமுத்திரத்தில் இருந்து 15-வது கிலோ மீட்டர் தொலைவில் அமைந்துள்ள ஆழ்வார்குறிச்சியின் மேற்கே 6 கி.மீதொலைவில் மேற்குத்தொடர்ச்சி மலை அடிவாரத்தில், அருள்மிகு பரமகல்யாணி உடனுறை சிவசைலநாதர்அருள்புரிகிறார். கடனையாறு என்றழைக்கப்படும் கருணையாற்றின் கரையில் அமைந்துள்ள சிவசைலம் என்னும்இவ்வூரின் பெயர் கடம்பவனமாகும்.

எழுந்து நிற்கும் நிலையிலுள்ள நந்திகேசுவரரும், பரமகல்யாணி அம்மன் நான்கு கைகளுடன் மேற்கு நோக்கிஅமைந்திருப்பதும், நல்லருள் பாலிக்கும் நாயகனை நாம் நான்கு திசைகளில் இருந்தும் தரிசிக்கக்கூடியதும்இவ்வாலயத்தின் தனிச்சிறப்பு. மேலும் சிவசைலத்தில் அமைந்துள்ள சிவபெருமான் பூமிக்கு மேலே ஒருபாகமும், பூமிக்குக் கீழே 15 பாகமும் கொண்டு பக்தர்களுக்கு அருள்பாலிக்கிறார்.

#ஆழ்வார்குறிச்சி – வன்னீஸ்வரர் கோயில்

இத்திருக்கோவிலின் சுவாமி சன்னதி முன்பாக உள்ள தூணில் கர்ப்பமான நிலையில் ஒரு அம்பிகை அருள்பாலித்துவருகிறாள். சுகப்பிரசவம் ஏற்படவும் விரைவில் திருமணம் நடைபெறவும்,கால சர்ப்ப தோஷம், ராகு கேது தோஷம் போன்றவை நீங்கிடவும் இந்த அம்மன் அருள்புரிகிறாள். இயந்திர வடிவில் நவக்கிரகங்கள், நாயுடன் கருவூராரும் காணப்படுவது மேலும் சிறப்பு. அக்னி பகவான் வழிபட்ட ஈசனென்பதால் அக்னீஸ்வரர், வன்னியப்பர், வன்னீஸ்வரர் என்றெல்லாம் அழைக்கப்படுகிறார். பாபநாசத்திலிருந்து 11 கிமீ தொலைவில் உள்ளது இவ்வாலயம்.

#கடையம் – வில்வவனநாதர் திருக்கோயில்

“காணி நிலம் வேண்டும் பராசக்தி” என்று மகாகவி பாரதி எந்த சக்தியிடம் வேண்டினாரோ, அந்த தியான நித்யகல்யாணி திருநெல்வேலி மாவட்டம் இந்தக் கடையம் வில்வவனநாதர் கோயிலில் அருள்பாலிக்கிறாள். இது ஒரு சிவாலயமாயினும் ராமாயணத்தோடு தொடர்புடைய சிற்பங்கள் இங்குள்ளன. கோயில் கதவில் தசரதரால் சிரவணன் கொல்லப்பட்ட சம்பவம் சிற்பமாக வடிக்கப்பட்டுள்ளது.

பிரம்மனுக்குச் சிவன் கொடுத்த வில்வபழத்தை மூன்றாக உடைத்த பிரம்மா ஒன்றைக் கைலாய மலையிலும், இன்னொன்றை மேருமலையிலும், மற்றொன்றை துவாத சாந்தவனத்திலும் நட்டார். அந்த துவாத சாந்தவனப் பகுதியில்தான் வில்வவனநாதர் கோயில் உள்ளது. தற்போது கோயிலுக்குள் உள்ள வில்வமரத்தில் எப்போதாவது தான் காய்காய்க்கும். இதை உடைத்தால் உள்ளே சிவலிங்க பாணம் இருக்கும். இத்தலத்து அம்மன் நித்யகல்யாணி என்பதால் எந்நாளும் எந்நேரமும் வரமருளுபவள். வில்வவனநாதரையும் நித்யகல்யாணியையும் காணப்பெற்றோர் பெரும்பேறுபெற்றவர்களே!

திருநெல்வேலியில் இருந்து 50 கி.மீ. அல்லது தென்காசியில் இருந்து 20 கிமீ. தொலைவில் கடையம் உள்ளது.

#திருப்புடைமருதூர் – நாறும்பூநாதர் கோயில்

தாமிரபரணியாற்றங்கரையில் அம்பாசமுத்திரத்திற்கு வடகிழக்கே அமைந்துள்ள சிவாலயம் திருப்புடைமருதூர் நாறும்பூநாதர் கோயில். இவ்வாலயத்தின் புராண பெயர் புடார்க்கினியீஸ்வரர்.

காயம்பட்ட சுயம்பு மூர்த்தியென்பதால் அவரின் காயம் ஆற்றிடும்பொருட்டு சந்தனாதித் தைலம் மட்டுமே பூசி பூஜைசெய்யப்படுகிறது. ருத்ராட்ச மேனியுடை கோமதி அம்பாள் வேண்டும் வரங்களை வாரி வழங்குகிறாள்.

“நாறும் பூவின் நடுவில் நிற்பவனே நினை தரிசிக்க எனக்கு அருள்புரிவாயோ” எனக்கேட்ட கருவூர் சித்தரின் வாக்கினைச் சாய்ந்து கேட்டதால் சுயம்புலிங்கமான நாறும்பூநாதர் சற்றே சாய்ந்தே காணப்படுகிறார். தேடிவரும் பக்தர்களின் வேண்டுதல்களைச் செவி சாய்த்தருள்கிறார்.

#பாபநாசம் – பாபநாசர் கோயில்.

இந்திரனின் பாவத்தை நீக்கியருள் புரிந்ததால் இவ்வாலய சிவன் பாபநாசநாதர் என்றும் அம்பாள் உலகம்மை,விமலை என்றபெயரிலும் அருள்பாலிக்கின்றனர். தாமிரபரணி ஆறு இவ்விடத்தில் சமநிலை அடைவதால் உச்சிகால பூஜையில்தாமிரபரணியில் உள்ள மீன்களுக்கு நைவேத்திய உணவுகள் படைக்கப்படுகின்றன. நவகைலாயங்களில் முதல் தலமான இந்த பாபநாசம் சூரியனுக்குரியது.

“திக்கெல்லாம் புகழுறும் திருநெல்வேலி’ என சம்பந்தரும், “தண் பொருநைப் புனல்நாடு’ எனச் சேக்கிழாரும், “பொன்திணிந்த புனல் பெருகும் பொருநைத் திருநதி’ என்று கம்பரும் பாடிய திருநெல்வேலியில் அமைந்துள்ள இந்த காசிக்கு நிகரான பஞ்ச குரோச ஸ்தலங்களை வழிபட்டு ஈசனருள் பெற்றிடுவோம்.

ஓம் சிவாய நம

சர்வம் சிவமயமே

எங்கும் சிவநாமம் ஒலிக்கட்டும்

அனைவருக்கும் சிவனருள் கிடைக்கட்டும்

ஆலவாயர் அருட்பணி மன்ற தந்தையே வணக்கங்கள்

உலகாளும் அம்மையப்பன் திருவருளுடன் அனைவருக்கும் இனிய சிவகாலை வணக்கங்கள்