🌺பிரியாணி🌺

 பிரியாணி என்று என் எதிரில் யாராவது நான்கைந்து முறை பேசினாலே போதும் எனக்கு பிரியாணி சாப்பிட்டே ஆக வேண்டும் என்கிற எண்ணம் தோன்றி விடும். என் வீட்டின் ஓர் அறையின் ஒரு ஜன்னலை திறந்தால் கிழக்கு கடற்கரை சாலையை பார்த்த விநாயகரின் முதுகும், இன்னொரு ஜன்னலைத் திறந்தால் ஸ்டார் பிரியாணியின் சமையல் கட்டும் தெரியும்

என்ன ஒரு வினோதம் பாருங்கள்...

வாயைக் கட்ட முடியாது என்பதற்காகவே ஸ்டார் பிரியாணி பக்க ஜன்னலை பர்மனென்டாக மூடி சீல் வைத்து விட்டேன் அப்படியும் பிள்ளைகள் அறையின் பால்கனி பக்கமும் ஸ்டார் பிரியாணி கிச்சன் என்பதால் வாசனையைப் பிடித்துக் கொண்டு வந்து என்னையும் தூண்டி விடுவார்கள். என்ன செய்வது....உடல் எடைக்கு பயந்து மனதை கல்லாக்கிக் கொள்ள வேண்டிய கட்டாயத்திற்கு கடவுள் என்னை தள்ளி விட்டு விட்டார்

வாரம் ஒரு நாளாவது பிரியாணி சாப்பிடாவிட்டால் என் மண்டை வெடித்து சுக்கு நூறாகி விடும் ஆனால் இவ்வளவு அடிமைப்பட்டு போன அந்த பிரியாணியைப் பற்றி சுமார் இருபத்தைந்து ஆண்டுகளுக்கு முன்பு வரை எனக்கு சுத்தமாக தெரியாது என்பது தான் நிஜம்

வீட்டில் அம்மா வாராவாரம் கறிக் குழம்பு, கறி வறுவல் செய்வார்கள். குஜராத்தில் இருந்தவரை பிரியாணி என்கிற பெயரைக்கூட நான் கேள்விப்பட்டது கிடையாது. 1987ல் இங்கு வந்தும் கூட பிரியாணி என்றால் என்னவென்று சில வருடங்கள் வரை எனக்குத் தெரியாது. எங்க சொந்தக்காரர்கள் வீட்டிலும் யாரும் பிரியாணி செய்ததாக கேள்விப்படவே இல்லை

ஒருமுறை மங்கையர்மலரில் பிரியாணியைப் பற்றி ஆகா ஓகோ என்று புகழ்ந்து ஒரு சமையல் குறிப்பு போட்டிருந்தார்கள். அதுவும் கூட என்னைப் பெரிதாக இம்ப்ரஸ் பண்ண வில்லை. ஆனால் மிக லேசான ஆர்வம் துளிர்விட்டது. அப்புறம் தூர்தர்ஷனில் ஒரு நாள் பிரியாணி சமையல் குறிப்பு போட்ட போது என்னுடைய லேசான ஆர்வம் சற்றே விசிறி விடப்பட்டது. அதன் சுவையைப் பற்றி அறிந்திராத காரணத்தால் அப்போதும் சமைக்க நான் முற்படவில்லை. கொஞ்ச நாளில் மறந்தும் போனேன்

ஒரு நாள் தியேட்டரில் படம் பார்த்துவிட்டு பசி எடுத்ததால் அப்படியே சாப்பிடலாம் என்று முனியாண்டி விலாஸ் போயிருந்தோம். அங்கே நிறைய பேர் பிரியாணி சாப்பிட்டுக் கொண்டு இருக்கவும் மங்கையர்மலரில் படித்தது நினைவுக்கு வர உள்ளுக்குள் உறங்கிக் கொண்டிருந்த சிறு ஆர்வம் பிரியாணியை ஆர்டர் செய்யத் தூண்டியது

தலைவாழை இலையில் தண்ணீர் தெளித்து துடைத்ததும் சுடச்சுட ஒரு கிண்ணத்தில் கொண்டுவந்த பிரியாணியை இலையில் கவிழ்த்து விட்டு போனார் சர்வர். அதிலிருந்து வந்த ஆவியின் மணம் நாசியில் புகுந்து தலையை கிறுகிறுக்கச் செய்தது. கூடவே வெங்காய தயிர் பச்சடியும், சிக்கன் வருவலும் கூட்டணி சேர எடுத்து வைத்த முதல் வாயிலேயே நான் பிரியாணிக்கு அடிமை ஆகிவிட்டேன்

ஆஹா... அன்னிக்கு விழுந்தவள் தான் இன்னமும் எழுந்திருக்கவே இல்லை ஞாயிற்றுக்கிழமை அன்று நாள் கிழமை என்று வந்து விட்டால் அந்த நாளையே திட்டித் தீர்க்கும் அளவுக்கு பிரியாணி பைத்தியம் ஆகி விட்டேன்.

ஆனால் என்னவருக்கோ ஆரம்பத்தில் அந்த சுவை பிடிக்கவில்லை. அதனால் வீட்டில் பிரியாணி செய்யும் முயற்சியை மேற்கொள்ள ஒரு சிறு தயக்கம் என்னுள். ஆனால் சாப்பிட்ட பிரியாணியின் சுவையோ என் நாவில் மட்டுமல்லாமல் மூளையிலும் சுற்றிச்சுழன்றடித்துக் கொண்டிருந்தது ஆனால் என்னவரிடம் வெளிப்படையாக கேட்கவும் ஒரு தயக்கம்

அந்த நேரம் பார்த்து ஒரு நல்ல வாய்ப்பு கிடைத்தது எனக்கு. பிள்ளைகள் வெளியே போகலாம் என்றழைக்கவும் ஒரு ஞாயிறன்று கிளம்பி கோவில், பீச் என்று சுற்றி விட்டு திரும்புகையில் அந்தக் காலகட்டத்தில் புதுவையில் பிரியாணிக்கு என்றே மிகவும் புகழ்பெற்றிருந்த நேரு வீதியில் அமைந்துள்ள அரிஸ்டோ (பிரியாணி சுவைக்கு அடிமையாகி எல்லாம் விசாரித்து தெரிந்து வைத்திருந்தது தான்) ஹோட்டலுக்கு போகலாம் என்று நான் கூறினேன்

என்னவருக்கு பிரியாணி பிடிக்காது என்பதால் அவருக்கு அங்கு போகவே விருப்பமில்லை. நான் பிரியாணியின் சுவையைப் பற்றி பிள்ளைகளிடம் ஒரேயடியாகப் புகழ்ந்து கீ கொடுத்து வைத்திருந்ததால் பிள்ளைகள் அரிஸ்டோவுக்குத் தான் போக வேண்டும் என்று ஒற்றைக் காலில் நின்றார்கள்

என்னவர் பரிதாபமாக என் முகத்தை ஏறெடுக்க, நான் பார்த்தும் பாராதது போல் பிள்ளைகள் பக்கம் கண்களைத் தாழ்த்த இரண்டாவது பிரியாணியின் ருசி அரிஸ்டோவில் அமர்க்களமாக அரங்கேறியது. ருசிகண்ட பூனையாக அன்று நான் ரசித்து ருசித்து சாப்பிட்டதைப் பார்த்த என்னவர் அதன்பிறகு எங்கே வெளியில் போனாலும் என்னை கேட்காமலேயே எனக்கு பிரியாணி ஆர்டர் செய்து விடுவார் அப்படி மாத்திட்டோம்ல

பிள்ளைகளுக்கும் என்னளவு இல்லை என்றாலும் ஓரளவுக்கு இந்த சுவை பிடித்துப் போகவும் அதன் பிறகு வீட்டிலும் சமைக்க ஆரம்பித்தேன் ஆரம்பத்தில் இந்த பிரியாணி என்னிடம் கொஞ்சம் ஆட்டம் காட்டினாலும் விடாக்கண்டனாக முயற்சித்து பிரியாணி சமைப்பதில் பிஎச்டி பட்டம் வாங்கி விட்டேன் ஆரம்பத்தில் தயங்கி தயங்கி என் பிரியாணியை சாப்பிட்ட என்னவர் இப்போதெல்லாம் ஆட்சேபிக்காமல் வீட்டில் மட்டும் நான் சமைத்த பிரியாணியை விரும்பி சாப்பிட ஆரம்பித்துவிட்டார்(இப்பவும் வெளியில் பிரியாணி சாப்பிட அவர் விரும்புவதில்லை)

இப்போதெல்லாம் நடப்பது, பறப்பது, மிதப்பது, ஓடுவது, குதிப்பது எல்லாவற்றிலும் பிரியாணி செய்யக் கூடிய அளவுக்கு தேர்ச்சி அடைந்துவிட்டேன் அம்மா அப்பா இருந்தவரை இரண்டு வாரத்திற்கு ஒரு முறையாவது அவர்களை அழைத்து பிரியாணி செய்து பரிமாறுவது வழக்கத்தில் இருந்தது அம்மாவுக்கு பிரியாணி என்றால் அவ்வளவு பிடிக்கும். அவங்க அதிகம் ஓட்டலில் எல்லாம் பிரியாணி சாப்பிட்டது கிடையாது

ஆனால் நான் அவ்வளவு எல்லாம் நல்லவளில்லைஎந்த ஊருக்குப் போனாலும் அங்கே எந்த ஓட்டலில் பிரியாணி நன்றாக இருக்கும் என்பதை விசாரித்துத் தெரிந்துகொண்டு மதிய உணவுக்கு பிரியாணி மட்டும்தான் சாப்பிடுவேன். ஆனியன் ராய்த்தா, கத்தரிக்காய் கொத்சு, சிக்கன் 65, முட்டை இல்லாமல் பிரியாணி சாப்பிடுபவர் முன் ஜென்மத்தில் பாவம் செய்தவர் என்பது என்னுடைய ஆணித்தரமான கருத்து.

இவ்வளவு நீளமா எழுதி முடிச்சிட்டேன். நான் எழுதியதை ஒருமுறை படித்துப் பார்த்ததும் எனக்கு இப்பவே பிரியாணி சாப்பிடணும்னு தோணுதே. ஆனால் இந்த நேரத்துக்கு பிரியாணிக்கு நான் எங்கே போவேன். நாளைக்கு கடா வெட்டி பிரியாணி போட்டுட வேண்டியதுதான் போல

வெவ்வேறு நாட்களில் செய்த பிரியாணிகளின் புகைப்படங்கள் பழைய மொபைலில் இருந்து...