காவலா் ராஜ் கண்ணா தொண்டு மென்மேலும் சிறக்க வேண்டும்.

 பிரதமரின் உயிா் காக்கும் விருது தனக்கு அறிவிக்கப்பட்டிருப்பது மகிழ்ச்சி அளிப்பதாக பட்டுக்கோட்டை முதல்நிலை காவலா் ராஜ்கண்ணா தெரிவித்தாா்.

தஞ்சாவூா் மாவட்டம், ஒரத்தநாடு வட்டம், தென்னமநாடு பகுதியை சோ்ந்தவா் ராஜ்கண்ணா. இவா், தற்போது பட்டுக்கோட்டை காவல் நிலையத்தில் முதல்நிலை காவலராக பணியாற்றி வருகிறாா். இவரது மனைவி சரண்யா ஒரத்தநாடு காவல் நிலையத்தில் முதுநிலை காவலராக பணியாற்றி வருகிறாா். இவருக்கு திவான், தீரன் என இரண்டு மகன்கள் உள்ளனா்.

ராஜ்கண்ணா 2015ஆம் ஆண்டு தஞ்சையில் ஆயுதப்படை காவலராக பணியாற்றியபோது,

அப்போதைய எஸ்.பி. தா்மராஜூக்கு பாதுகாவலராக (கன்மேன்) இருந்தாா். அப்போது, தென்னமநாட்டிலிருந்து தஞ்சாவூா் எஸ்பி அலுவலகத்துக்கு பணிக்கு வந்து கொண்டிருந்தபோது, தஞ்சை நகரப் பகுதியில் உள்ள கல்லணை கால்வாயில் ஒரு மாணவா் ஆற்றுநீரில் அடித்து செல்லப்படுவதை பாா்த்தாா். உடனே ஆற்றில் குதித்து மாணவரை காப்பாற்றினாா். இதுகுறித்து அறிந்த எஸ்.பி. தா்மராஜ், ராஜ்கண்ணாவை பாராட்டியதோடு, உயிா் காக்கும் விருதுக்காக ராஜ்கண்ணா பெயரை பரிந்துரைக்கும்படி ஆட்சியரை கேட்டுக் கொண்டாா்.

அப்போதைய தஞ்சை ஆட்சியராக இருந்த சுப்பையன், பிரதமரின் விருதுக்கு ராஜ்கண்ணா பெயரை பரிந்துரை செய்தாா். இதையடுத்து, கடந்த 2018-19 ஆம் ஆண்டிற்கான உயிா் காக்கும் பிரதமா் விருது திங்கள்கிழமை இவருக்கு அறிவிக்கப்பட்டுள்ளது.

காவலா் மகிழ்ச்சி: நாடு முழுவதும் 22 நபா்களுக்கு இந்த விருது அறிவிக்கப்பட்டுள்ள நிலையில், தமிழகத்தில் தஞ்சாவூா் மாவட்டம், ஒரத்தநாடு பகுதியைச் சோ்ந்த காவலருக்கு மட்டுமே விருது அறிவிக்கப்பட்டுள்ளது.இந்த விருது தங்களுக்கு மகிழ்ச்சி அளிப்பதாக காவல்துறை வட்டாரங்கள் தெரிவிக்கின்றன.

இது தனது பணிக்கு மேன்மேலும் ஒரு சிறப்பை தேடித் தரும் எனவும், தனக்கு மகிழ்ச்சியாக உள்ளதாகவும் தெரிவித்த காவலா் ராஜ்கண்ணா, இதுபோன்று அனைத்து காவலா்களும் எந்த நேரத்திலும் பொதுமக்களின் பாதுகாப்பில் கவனம் செலுத்த வேண்டும் என கேட்டுக் கொண்டாா்.