சுலபமா செய்யலாம் ஜவ்வரிசி லட்டு.

ஜவ்வரிசியில் பாயாசம் செய்து சாப்பிட்டு இருப்பீங்க. இன்று ஜவ்வரிசியை வைத்து அருமையான லட்டு செய்வது எப்படி என்று பார்க்கலாம்.

ஜவ்வரிசி லட்டு

தேவையான பொருட்கள் :

ஜவ்வரிசி - 100 கிராம்
சர்க்கரை - 100 கிராம்
குங்குமப்பூ - ஒரு சிட்டிகை
ஏலக்காய்த்தூள் - ஒரு சிட்டிகை
முந்திரி - 200 கிராம்

நெய் - தேவையான அளவு

செய்முறை:

முதலில் ஜவ்வரிசியை தண்ணீரில் சுமார் 8 மணி நேரம் ஊறவிடவும்.

முந்திரியை கொரகொரப்பாக பொடித்து கொள்ளவும்.

வாணலியை அடுப்பில் வைத்து ஜவ்வரிசியை சேர்த்து கிளறிக் கொண்டே இருக்கவும். சுமார் 5 நிமிடங்களுக்கு கிளறிக் கொண்டே இருந்தால் வெந்து உதிரியாக மாறும்.

பின்னர் இதில் சர்க்கரை, ஏலக்காய்த்தூள் சேர்த்து கிளறி வேகவிடவும்.

அத்துடன், தண்ணீரில் ஊறவைத்த குங்குமப்பூ சேர்த்து நன்றாக கிளறி விடவும். அவ்வப்போது நெய் சேர்த்து கிளறிக்கொண்டே இருக்கவும்.

ஜவ்வரிசி நன்றாக வெந்து வாணலியில் ஒட்டாத பதத்திற்கு வந்ததும் பொடித்த முந்திரி சேர்த்து கிளறி இறக்கவும்.

சூடு ஓரளவுக்கு தணிந்ததும், கொஞ்சமாக எடுத்து லட்டு போன்று உருண்டைகள் செய்து வைக்கவும்.

சுவையான ஜவ்வரிசி லட்டு ரெடி.