சிறுமி ஜிக்கி!

 1950-ம் ஆண்டில் மாடர்ன் தியேட்டர்ஸ் தயாரிப்பில் மக்கள் திலகம் நடித்து கருணாநிதி அவர்கள் கதை, வசனத்தில் வெளியான படம் மந்திரி குமாரி. இந்தப் படத்தில் முக்தா ஸ்ரீனிவாசன் அவர்கள் உதவி இயக்குனராக பணியாற்றி இருக்கிறார்.

படத்தில் கதாநாயகி பாடும் பாடல்களுக்கு ஏற்கெனவே ஒருசில படங்களில் பாடிய அந்தச் சிறுமியை பாடவைக்க முடிவு செய்தார் இசை மேதை ஜி.ராமநாதன். தயாரிப்பாளர் டி.ஆர்.சுந்தரம் அவர்களுக்கு சிறுமியின் திறமை மீது சந்தேகம். இருந்தாலும், சிறுமிக்காக வாதாடி அவரையே பாடல்களைப் பாடவைத்தார் ஜி.ராமநாதன் அவர்கள்.

"ஆஹா மாருதம் வீசுவதாலே ஆனந்தம் பொங்குதே மனதிலே" .. என்று பாடலைக் கேட்பவர்களின் உள்ளங்களில் ஆனந்தம் பொங்கியதால் "வாராய் நீ வாராய்.." என புகழ் அந்தச் சிறுமியை உச்சிக்கு அழைத்துச் சென்றது.

"குதர்க்கம் பேசி என்னை மயக்க எங்கு கற்றீரோ?" என்று கேட்டு குரலால் மயக்கிய அந்த 15 வயது சிறுமி ஜிக்கி! பட்டிதொட்டி எல்லாம் பரவிய இவ்வளவு பெரிய புகழை சிறுமியாக இருந்த ஜிக்கி எதிர்பார்க்கவில்லை.

எதிர்பாராத திருப்பங்களும் சுவாரஸ்யங்களும் ஆச்சர்யங்களும் நிரம்பியதுதான் வாழ்க்கை!