🌹#இளையராஜாவும் ரஜினிகாந்த்தும்*

 

என் ரசிகர்களுக்கு பிடிக்காது இந்த பாடலுக்கு நடிக்க மாட்டேன் என ரஜினி மாற்ற சொன்ன பாடல்,திருச்சி ஜயப்பன் கோவிலில் ஒலிக்கப்படும் பெருமை பெற்ற பாடல் “ அம்மா என்றழைக்காத உயிரில்லையே”.

யாருமே வேண்டாம் என ஒதுக்கிய பாடல் என இருக்குல்ல அதுல இருந்து எடுத்து கொள்கின்றேன் என ஆர்.வி உதயகுமார் ராஜாவின் குப்பையிலிருந்து எடுத்த பாடல் “ ஒரு நாளும் எனை மறவாத” ..

தேவர் மகனில்” சிவாஜியையும், எத்தனையோ படங்களில் கமலையும், ஏன் “பா”வில் அமிதாப்பையும் பாட வைத்த இசைஞானி இளையராஜா, ரஜினியை மட்டும் விட்டு விடுவாரா என்ன.ரஜினி பாடிய ஒரே பாடல் “அடிக்குது குளிரு”

தபேலா, மொரோக்கோ, டிரம்ஸ் எனும் மூன்று தாளக் கருவிகளையும் ஒரு அற்புதமான புதுமையான வரிசையில் இணைத்து கூடவே புல்லாங்குழலையும் நுழைத்திருக்கும் பாடல் “அடுக்கு மல்லிகை இது ஆள் புடிக்குது”..

ரஜினியோடு, இசைஞானி இணைந்த முதல் படமான கவிக்குயிலில் பாலமுரளி கிருஷ்ணாவை கொண்டு தந்த மறக்க முடியாத மெலடி பாடல் “சின்னக் கண்ணன் அழைக்கிறான்”

ரஜினியும் இசைஞானியும் கடைசியாக இணைந்த படம் அந்தப் படத்தில் மொத்தம் ஒன்பது பாடல்கள்.ஒன்பதும் சூப்பர் ஹிட்டான படம் வீரா ! அதில் ரஜினியை மட்டுமல்ல தமிழகமே கொஞ்சிய பாடல் “கொஞ்சிக் கொஞ்சி அலைகள் ஓட”

சர்வதேச அளவில் மிக பெரிய வெற்றி பெற்ற பாடல் “ராக்கம்மா கையத் தட்டு” ..

நான் சிகப்பு மனிதன் படத்தில் வருகின்ற, “பெண் மானே சங்கீதம் பாடவா” பாடலும், மிஸ்டர் பாரத் படத்தில் வரும் “என்னம்மா கண்ணு” பாடலும், வள்ளி படத்தில் வரும் “என்னுள்ளே என்னுள்ளே” பாடலும் எப்போதுமே ரசிகர்களின் காதுகளை நிராகரித்து நகர்வதில்லை.

கை கொடுக்கும் கை படத்தில் வருகின்ற, “தாழம் பூவே வாசம் வீசு” பாடல் ஒரு வகையில் நம் மனதுக்குள் நுழைந்து இம்சிக்கின்ற ரஜினியின் வெற்றி பாடல்.

ரஜினி, தர்மதுரை படத்தில் தான் நடிக்க வேண்டிய ஒரு பாட்டுக்கான சிச்சுவேஷனை சொல்லிவிட்டு, ‘தண்ணி கருத்திருச்சி’ என்ற பாடல் மாதிரியே வேண்டும் என கேட்க அதுதான் நான் ஏற்கனவே இசை அமைத்துவிட்டேனே உங்களுக்கு புதிதாக ஒரு பாட்டு தருகிறேன் என்று சொல்லி இசை அமைத்த பாடல் தான் தர்மதுரை படத்தில் இடம் பெற்ற ‘மாசி மாசம் ஆளான பொண்ணு’..

குரல்களை வைத்து ஜாலம் காட்டிய இசைஞானியின் பாடல்கள் எக்கச்சக்கம் உண்டு. அத்தகைய முயற்சிகளின் ஆரம்ப காலங்களில் அசத்திய பாடல் இது. இசைஞானி பயன்படுத்தியிருக்கும் குரல்களின் கோர்வை, நல்லிணக்கம், கூட்டிசை என இன்றும் வியக்க வைக்கும் அந்தப் பாடல்..இன்றைய தொழில்நுட்பத்தில் அந்த சாத்தியம் எளிது, ஆனால் எந்த தொழில் நுட்ப ஒட்டு வேலைகளும் இல்லாத அந்த காலத்தில் அவர் செய்த அசாத்தியமான அந்த பாடல் கழுகு படத்தில் இடம்பெற்ற “பொன் ஓவியம்”...

“சிட்டுக்கு செல்லச் சிட்டுக்கு” பாடல் கண்ணீரை வரவழைக்கும் என்றால், “நம்ம முதலாளி” பாடல் உற்சாகத்தை ஊற்றெடுக்க வைக்கும், “உன்னைத் தானே” பாடல் காதலின் தேசிய கீதம் என்றால், “வச்சிக்கவா” பாடல் ஆட வைக்கும்..

இசைஞானி ஆன்மீகத்தின் கரைகளில் நடந்து திரியும் ஒரு சங்கீதப் பறவை. அவருடைய திருவாசகத்தின் அழுத்தம் இசைப் பிரியர்கள் நன்கு அறிந்தது. ஏசுதாஸ் குரலில் இசைஞானி ரஜினிக்கு தந்த இன்னொரு முத்திரை ஸ்ரீராகவேந்திரா படத்தில் பாடலின் தெய்வீகத்தை இழைத்து தந்த பாடல் “ஆடல் கலையே தெய்வம் தந்தது”..

நான் மகான் அல்ல படத்தில் வருகின்ற, “மாலை சூடும் வேளை” பாடலும் சரி, தங்க மகன் படத்தில் வரும் “வா வா பக்கம் வா” பாடலும் சரி ரஜினியின் முத்திரைப் பாடல்கள்.

தங்க மகன் படத்தின் சூப்பர் டூப்பர் ஹிட் பாடல் என்றால் அது “ராத்திரியில் பூத்திருக்கும் தாமரை தான் பெண்ணோ” பாடல்..

நெற்றிக்கண் படத்தின் வெற்றிக்கு பெரிதும் காரணமாய் இருந்த ஸ்டைல் கேரக்டர் தந்தை ரஜினி...இவர் சில்மிஷ மன்னர் என்பதைக் காட்ட குறும்போடு வரும் இசையானது 2.30 நிமிடங்களுக்கு வசனமே இல்லாமல் இவரின் அறிமுகக் காட்சி இசையாலேயே நிரப்பப்பட்டிருக்கும்..இப்போதும் இந்த இசை வந்தாலே தந்தை ரஜினி உங்கள் கண்முன் தோன்றுவார்..

ரஜினி இசைஞானி கூட்டணியில் வெற்றி பாடல்கள் கடல் போல..மேலே நாம் கண்ட பாடல்கள் என்பது அந்த கடல் நீரில் ஒரு குவளை மட்டுமே ...ரஜினி ஹிட்ஸ் என எங்கே தேடினாலும் கொட்டுவது இசைஞானி பாடல்களே 90 சதவீதம்..

ரஜினியோடு பல மொழிகளில் மொத்தம் 65 படங்கள் வரை பணியாற்றியிருக்கிறார் இசைஞானி இளையராஜா. ரஜினியின் அதிக படங்களுக்கு இசை இவர் தான்.

ரஜினியின் படங்களுக்கு புதியதாய் பலர் இசையமைத்து இருந்தாலும் இன்றும் மென்மையாய் வருடும் ஆட வைக்கும் பாடல்களில் பெரும்பாலானவை இசைஞானி இளையராஜா பாடல்களே.

#இளையராஜாவைத் தவிர்த்துவிட்டு ரஜினி படங்களின் இசையைப் பற்றிப் பேச முடியாது என்பதே யதார்த்தம் !*