ஏய்டன் மார்க்ரம் 45வது ஓவரை வீசினார். ஆஸ்திரேலியா வெற்றிக்கான ரன்களை தேடிக் கொண்டிருந்தது. களத்தில் நின்றது கேப்டன் பேட் கம்மின்ஸும் மிட்செல் ஸ்டார்க்கும்.இருவருமே தடுப்பாட்டம் ஆடி ஒவ்வொரு ரன்னாய் சேர்த்துக் கொண்டிருந்தனர். மார்க்ரம் வீசிய 2வது பந்து அது. பேட் கம்மின்ஸ் பேட்டின் நுனியில் பட்டு ..ஸ்டம்புகளுக்கு பின்னால் நின்ற விக்கெட் கீப்பர் டி காக் வசம் சென்றது. ஆனால் அதை டி காக்கால் பிடிக்க முடியவில்லை. ஆட்டத்தையே தலைகீழாக மாற்றும் வல்லமை அந்த கேட்சுக்கு இருந்தது. அதிர்ஷடம் தென்னாபிரிக்கா பக்கம் இல்லை என வர்ணணையாளர்கள் வர்ணித்தனர். ஏய்டன் மார்க்ரம் முகத்தில் சோகம் நிறைந்திருந்தது. கேப்டன் டெம்பா பவுமா நொந்து கொண்டார். ஒரேயொரு கேட்ச், ஆஸ்திரேலியாவை நெருக்கடிக்குள் தள்ளியிருக்கும். அதைப் பயன்படுத்தி தென்னாப்ரிக்கா தனது காயங்களுக்கு மருந்தளித்திருக்கும். ஆனால், அது நடக்கவில்லை. தென்னாப்பிரிக்காவின் உலகக்கோப்பை கனவு கானல் நீராகிப் போனது. விக்கெட்டை விடாமல் போராடிக் கொண்டிருந்த ஆஸ்திரேலிய கேப்டன் பேட் கம்மின்ஸே, இறுதியில் வின்னிங் ஷாட் அடித்து ஆட்டத்தை முடித்து வைத்தார். அரையிறுதியுடன் வெளியேறும் சோகம் ஐந்தாவது முறையாக தென் ஆப்பிரிக்காவை துரத்துகிறது..ஆஸ்திரேலிய அணி 12 முறை உலகக்கோப்பையில் பங்கேற்று ...8வது முறையாக இறுதிப் போட்டிக்குள் நுழைந்துள்ளது. 20 ஆண்டுகளுக்குப் பிறகு இந்தியாவும் ஆஸ்திரேலிய அணியும் இறுதிப் போட்டியில் மோதவுள்ளன.உலகக்கோப்பையின் தொடக்கத்தில் அடுத்தடுத்து 2 தோல்விகளைச் சந்தித்து ஆஸ்திரேலியா மோசமாகத் தொடங்கியது. ஆனால், மீண்டு வந்து அடுத்தடுத்து வெற்றிகளைப் பெற்று ..இறுதிப்போட்டிக்கு முன்னேறி ஐந்து முறை சாம்பியன் என்பதை நிரூபித்துள்ளது.தென் ஆப்பிரிக்கா அணி என்றாலே, முக்கியமான போட்டிகளில், தருணங்களில் பதற்றப்படும், வாய்ப்பைத் தவறவிடும் என்ற கூற்றை இந்த முறையும் உண்மையாக்கியது. ஆனால், போட்டியின் முடிவை தங்களுக்குச் சாதகமாக மாற்ற தென் ஆப்ரிக்கா போராடியது. ஆனால், 212 ரன்களை வைத்துக்கொண்டு டிபெண்ட் செய்வது கடினமானது. இன்னும் கூடுதலாக 50 ரன்களை சேர்த்திருந்தால், ஆட்டம் தென் ஆப்ரிக்கா பக்கம் சாய்ந்திருக்கும்.தென் ஆப்பிரிக்கா அணியில் ஷாம்ஸி, மகராஜ், கோட்ஸி, மார்க்ரம் ஆகிய 4 பேரும் ...மிகச் சிறப்பாகப் பந்துவீசி, ஆஸ்திரேலிய அணிக்கு நெருக்கடி கொடுத்தனர். ஆனால், இவர்களின் பங்களிப்புக்கு வலுசேர்க்கப் போதுமான ஸ்கோர் இல்லை என்பது வருத்தமானது.அதுமட்டுமல்லாமல் தென் ஆப்பிரிக்க அணி எதிர்பார்த்த அளவு ஃபீல்டிங்கை ...இதுபோன்ற முக்கியமான ஆட்டங்களில் வெளிப்படுத்தவில்லை. ஃபீல்டிங்கிற்கு பெயரெடுத்த தென் ஆப்பிரிக்க அணி இந்த ஆட்டத்தில் மட்டும் 8 கேட்சுகளை கோட்டைவிட்டது. முக்கிய கேட்சுகளை கோட்டைவிட்ட போதே ஆட்டம் கையைவிட்டுச் சென்றுவிட்டது.அது மட்டுமல்லாமல் தென் ஆப்பிரிக்க தோல்விக்கு கேப்டன் பவுமாவின் முடிவு முக்கியக் காரணம். வேகப்பந்துவீச்சுக்கு சாதகமான ஆடுகளம், காலநிலை இருப்பது தெரிந்தும் ...டாஸ் வென்று ஏன் பேட்டிங்கை தேர்ந்தெடுத்தார் என்பது புரியாத புதிராகவே இருக்கிறது.ஆனால், ஆஸ்திரேலிய அணியைப் பொறுத்தவரை அரையிறுதிப் போட்டி என்றவுடன் ...தங்களின் கடந்த கால அனுபவங்களை ஒன்று திரட்டி ...எவ்வாறெல்லாம் எதிரணிகளைக் குழப்புவது, சிதைப்பது, வீழ்த்துவது என்பதைத் திட்டமிட்டு செய்தனர்.டிராவிஸ் ஹெட்டின் அதிரடி ஆட்டம் ஆஸ்திரேலியாவின் பணியை பாதி முடித்துவிட்டது. ஆட்டநாயகன் விருதும் டிராவிஸ் ஹெட்டுக்கு வழங்கப்பட்டது. பந்துவீச்சிலும் தென் ஆப்பிரிக்காவின் இரு முக்கிய விக்கெட்டுகளை வீழ்த்தி திருப்புமுனையை ஹெட் ஏற்படுத்தினார்.
No comments:
Post a Comment