16 தீர்மானங்கள் பழனிசாமி முடிவு?

 அ.தி.மு.க., பொதுக்குழுவில், 16 தீர்மானங்களை நிறைவேற்ற, பழனிசாமி தரப்பு முடிவு செய்துள்ளதாக, தகவல் வெளியாகி உள்ளது.

அ.தி.மு.க., பொதுக்குழுக் கூட்டம், வரும் 11ம் தேதி, சென்னை வானகரத்தில் உள்ள, ஸ்ரீவாரு திருமண மண்டபத்தில் நடக்கும் என, பழனிசாமி தரப்பு தெரிவித்துள்ளது. அதற்கு நீதிமன்றத்தில் தடையுத்தரவு பெற, பன்னீர்செல்வம் தரப்பு முயற்சித்து வருகிறது. ஆனால், பழனிசாமி தரப்பினர், கூட்டத்திற்கான ஏற்பாடுகளை, தீவிரமாக செய்து வருகின்றனர். திருமண மண்டபத்திற்கு வெளியே, திறந்தவெளியில் பந்தல் அமைக்கும் பணி, வேகமாக நடந்து வருகிறது.

பொதுக்குழு உறுப்பினர்களுக்கு அழைப்பிதழ் அனுப்பும் பணியும் நடந்து வருகிறது.பொதுக்குழுவில், ஒருங்கிணைப்பாளர், இணை ஒருங்கிணைப்பாளர் பதவியை ரத்து செய்துவிட்டு, ஏற்கனவே உள்ள பொதுச்செயலர் பதவியை மீண்டும் கொண்டு வருவது, தற்காலிக பொதுச்செயலராக பழனிசாமியை நியமிப்பது உட்பட, 16 தீர்மானங்கள் நிறைவேற்றப்பட உள்ளன.கடந்த பொதுக்குழுவில் நிராகரிக்கப்பட்ட தீர்மானங்களில் சில, இந்த முறை நிறைவேற்றப்பட உள்ளன.