அரிசி மாவு, பிஸ்கட் தயாரிப்பு நிறுவன பெயரில் ரூ. 3,269 கோடி வங்கி மோசடி வழக்கில் பிரபல ஆடிட்டர் கைது: அமலாக்கத்துறை அதிரடி நடவடிக்கை.

  ரூ.3,269 கோடி வங்கி மோசடி வழக்கில் டெல்லியை சேர்ந்த பிரபல ஆடிட்டரை அமலாக்கத்துறை கைது செய்துள்ளது.

டெல்லியைச் சேர்ந்த சக்தி போக் ஃபுட்ஸ் லிமிடெட் நிறுவனம், அதன் நிர்வாக இயக்குனர் கேவால் கிருஷ்ணா குமார், இயக்குநர்கள் சுனந்த குமார் மற்றும் சித்தார்த் குமார் மற்றும் சில அரசு ஊழியர்கள் மீது ரூ 3,269 கோடிக்கு மேல் வங்கி மோசடி செய்ததாக சிபிஐ வழக்கு பதிவு செய்துள்ளது. ஸ்டேட் பாங்க் ஆப் இந்தியா (எஸ்பிஐ) அளித்த புகாரின் அடிப்படையில், சிபிஐ டெல்லியில் எட்டு இடங்களில், குற்றம் சாட்டப்பட்டவரின் அதிகாரப்பூர்வ மற்றும் குடியிருப்பு வளாகங்களில் தேடல்களை நடத்தியது. இதன் மூலம் சிபிஐ குற்றச்சாட்டுக்குத் தேவையான பல ஆவணங்களை மீட்டுள்ளதாகக் கூறப்படுகிறது.

               எஸ்பிஐ மற்றும் பிற வங்கிகள் சக்தி போக் நிறுவனம் மீது குற்றவியல் சதி, மோசடி, பண மோசடி உள்ளிட்ட குற்றங்களை சுமத்தியுள்ளன. சக்தி போக்கின் உயர் அதிகாரிகள் கணக்குகளை பொய்யுரைத்து, ஆவணங்களை மோசடி செய்வதன் மூலம் பொது பணத்தை பறித்ததாக வங்கிகள் கூறியுள்ளன. கடந்த 2015-16 நிதியாண்டின் தடயவியல் தணிக்கையில், பூச்சி காரணமாக சக்தி போக் ரூ 3,000 கோடி நஷ்டம் ஏற்பட்டதாக போலிக் கணக்குகளை காட்டியுள்ளது. எனினும், நிறுவனத்தின் பங்கு மற்றும் இதர தணிக்கை அறிக்கை 2015ம் ஆண்டில் நிறுவனத்தின் கிடங்குகளில் ரூ 3,500 கோடிக்கு மேல் இருப்பதைக் காட்டியதாக வங்கிகள் கூறியுள்ளன.
இந்நிலையில், சக்தி போக் ஃபுட்ஸ் லிமிடெட் நிறுவனத்தின் ஆடிட்டர் ராமன் புராரியாவை அமலாக்க இயக்குநரகம் கைது செய்துள்ளது. முன்னதாக, ஆடிட்டர் ராமன் புராரியாவின் முன்ஜாமீன் மனுவை சிறப்பு நீதிமன்றம் நிராகரித்ததால், அமலாக்கத்துறை பல இடங்களில் சோதனைகளை நடத்தி, தற்போது கைது செய்துள்ளது. சோதனைகளின் போது, ​​முக்கிய ஆவணங்கள், டிஜிட்டல் ஆதாரங்களையும் அமலாக்கத்துறை கைப்பற்றியுள்ளது.

இதுகுறித்து அமலாக்கத்துறை வட்டாரங்கள் கூறுகையில், ‘ஆடிட்டர் ராமன் புராரியா, பல்வேறு நிறுவனங்களின் பெயரில் போலி ஆவணங்களை தயாரித்து வங்கிகளில் கடன் பெற்றுத் தந்துள்ளார். தற்போது கைது செய்யப்பட்ட அவர், 20ம் தேதி வரை அமலாக்கத்துறை காவலில் இருப்பார். ஏற்கனவே, சக்தி போக் ஃபுட்ஸ் லிமிடெட் தலைவர் மற்றும் நிர்வாக இயக்குனர் கேவால் கிஷன் குமாரை கைது செய்து விசாரித்து வருகிறோம். இந்நிறுவனம் கோதுமை, அரிசி மாவு, பிஸ்கட் போன்றவற்றை உற்பத்தி செய்து விற்பனை செய்து வந்தது’ என்றன.