நார்த்தங்காயும் பல்வலியும்!!

 20 வருடங்களுக்கு முன் வெளி வந்த ஒரு பழைய புத்தகத் தொகுப்பில் படிக்க நேர்ந்த ஒரு மருத்துவக்குறிப்பு இது.

பல்வலிக்கு பல மருத்துவக்குறிப்புகள் படித்திருக்கிறேன்.

இது முற்றிலும் வித்தியாசமாக இருந்தது.

நகரத்தில் வாழ்ந்த ஒரு பெண்மணி, கிராமத்திற்குச் சென்றபோது பல்வலி வர, அங்குள்ள‌வர்கள் சொன்ன கை வைத்திய முறை இது.

உடனேயே வலியும் போய் பற்களும் வலியில்லாமல் வலுவுடன் இருப்பதை உணர்ந்து அடுத்தவர்களுக்கும் பயன்படவேண்டும் என்பதற்காக எழுதிய விபரம் இது.

முன்பெல்லாம் உப்பு நார்த்தங்காய் போட்டு வீட்டில் பீங்கான் ஜாடியில் பத்திரப்படுத்தி வைத்திருப்பார்கள். வருடம் முழுவதும் கெடாமல் இருக்கும்.

பல் வலியின் போது, எந்தப் பல் வலிக்கிறதோ அந்த பல் முழுவதும் படுவது போல ஒரு உப்பு நார்த்தங்காய் துண்டை அமுக்கி வைத்துக்கொன்டு அப்படியே படுத்துறங்கி விடவேண்டும்.

காலையில் எழும்போது பல் வலி இருக்காது.

காலை எழுந்தது பிறகு வாய்க்கொப்பளித்து விட்டு உப்பு கலந்த வெதுவெதுப்பான வெந்நீரில் வாயைக்கொப்பளிக்க வேன்டும்.

இது போல 3 நாட்கள் செய்து வந்தால் நார்த்தையிலிருக்கும் உப்பும் கசப்பும் பல்வலிக்குக் காரணமான பூச்சிகளைக் கொன்று பற்களை முன்னை விட வலுவானதாக மாற்றி விடுகிறதாம்.

உப்பு நார்த்தங்காய் செய்யும் விதம்:

நார்த்தங்காயை கழுவி துடைத்து, சுருள் சுருளாக நறுக்கவும்.

தனியாக வராமல் ஸ்பிரிங் போல் வரவேண்டும்.

கல் உப்பை சுருளுக்குள் திணித்து, 3 நாட்கள் அப்படியே ஜாடியில் போட்டு வேடு கட்டி வைக்கவும்.

தினமும் குலுக்கி மட்டும் விடவும்.

நான்காம் நாள் தண்ணீரிலிருந்து (உப்பு கரைந்து தண்ணீராக இருக்கும்) எடுத்து காயை மட்டும் வெய்யிலில் காய வைக்கவும்.

மாலையில் திரும்ப எடுத்து, அந்த தண்ணீருக்குள் போட்டு குலுக்கி வைக்கவும்.

இது போல் தண்ணீர் வற்றும் வரை செய்யவும்.

பிறகு வற்றல் நன்கு காயும் வரை வெயிலில் வைத்து எடுக்கவும்.

மேலே உப்பு பூத்து விடும். அப்போது எடுத்து ஜாடியில் எடுத்து வைத்துக் கொண்டால் வருடக்கணக்கில் கெடாமல் இருக்கும்.