சுமலதாவுக்கு ரஜினி பிரசாரம்? கர்நாடக அரசியலில் பரபரப்பு!

கர்நாடகாவின் மாண்டியா லோக்சபா தொகுதியில், நடிகை சுமலதா போட்டி யிட்டால், அவருக்காக, நடிகர் ரஜினி பிரசாரம் செய்யவுள்ளதாக, தகவல் வெளியாகிஉள்ளது.
கர்நாடகாவில், முதல்வர் குமாரசாமி தலைமையிலான, மதச் சார்பற்ற ஜனதா தளம் - காங்., கூட்டணி ஆட்சி நடக்கிறது. பிரபல கன்னட நடிகரும், காங்கிரசில் மூத்த தலைவர்களில் ஒருவராக இருந்தவருமான, அம்பரீஷ், சமீபத்தில் இறந்தார்.இந்நிலையில், அம்பரீஷின் மனைவியும், முன்னாள் நடிகையுமான, சுமலதா, 55, வரும் லோக்சபா தேர்தலில், மாண்டியா தொகுதியில், காங்கிரஸ் சார்பில் போட்டியிட தயாராகி வருகிறார். 
இவர், தமிழில், முரட்டுக்காளை என்ற படத்தில், ரஜினியுடன் நடித்தவர்.கன்னடத்தில் உள்ள பிரபலமான நடிகர்கள் அனைவரும், சுமலதாவுக்கு ஆதரவாக, பிரசார களத்தில் குதிக்க தயாராக உள்ளனர். அம்பரீஷுக்கு நெருங்கிய நண்பர், நடிகர் ரஜினி.சுமலதா போட்டியிட்டால், ஒரு நாள் மட்டும் பிரசாரம் செய்ய, ரஜினி தயாராக இருப்பதாக, கன்னட சினிமா வட்டாரங்கள் தெரிவிக்கின்றன. 
அம்பரீஷின் நண்பரும், லிங்கா பட தயாரிப்பாளருமான, ராக்லைன் வெங்கடேஷ், தன் நெருங்கிய நண்பர்களிடம், இந்த தகவலை தெரிவித்துள்ளதாக கூறப்படுகிறது.ஆனாலும், சுமலதாவுக்கு, 'சீட்' கொடுக்க, காங்கிரஸ் மேலிடம் தயக்கம் காட்டி வருகிறது. காங்கிரசில் வாய்ப்பு அளிக்காவிட்டால், சுயேச்சையாக போட்டியிட அவர், தயாராக இருப்பதாக கூறப்படுகிறது.