🏵️ சனிப்பெயர்ச்சி 2023...

 

எந்த ராசிக்கு சூப்பர்?

நவகிரகங்களில் மிகவும் முக்கியமான பாவகிரகமாக கருதப்படுவது சனி கிரகம் ஆகும். சனி கொடுப்பதையும், கெடுப்பதையும் யாராலும் தடுக்க முடியாது. அவரவர்களின் கர்மவினைக்கு ஏற்ப சுப மற்றும் அசுப பலன்களை அளிக்கக்கூடிய கிரகமாக கருதப்படக்கூடியவர் சனிதேவர் ஆவார்.

அவர் ஒரு ராசியில் இருந்து இன்னொரு ராசிக்கு பெயர்ச்சி அடைய எடுத்துக்கொள்ளும் கால அளவு இரண்டரை வருடம் ஆகும். அந்த இரண்டரை வருடம் முழுவதும் சனிதேவர் தான் நின்ற ராசியில் இருந்து தனது சுப மற்றும் அசுப பலன்களை அளிக்கக்கூடியவர் ஆவார்.

சனிபகவான் ஒருவரின் ஜென்ம ராசிக்கு 3, 5, 6, 9, 10, 11 ஆகிய இடங்களில் கோச்சார ரீதியாக சஞ்சரிக்கும் காலக்கட்டத்தில் இன்னல்கள் இல்லாத இன்பங்களை அளிப்பார்.

சனிப்பெயர்ச்சி எப்போது நிகழ்கிறது?

2023ஆம் ஆண்டு தை மாதம் 3ஆம் நாளான ஜனவரி 17ஆம் தேதி திருக்கணித பஞ்சாங்கப்படியும்,

2023ஆம் ஆண்டு பங்குனி மாதம் 15ஆம் நாளான மார்ச் மாதம் 29ஆம் தேதி வாக்கிய பஞ்சாங்கப்படியும் சனிபகவான் மகர ராசியிலிருந்து கும்ப ராசிக்கு பெயர்ச்சி அடையப் போகிறார்.

2023 சனிப்பெயர்ச்சியால் நன்மை பெறும் ராசிகள் :

மேஷ ராசிக்கு லாபச் சனியால் மேன்மை உண்டாகும் காலம்.

ரிஷப ராசிக்கு கர்மச் சனியால் தொழில் சார்ந்த துறைகளில் முன்னேற்றம் உண்டாகும் காலம்.

மிதுன ராசிக்கு பாக்கியச் சனியால் இன்னல்கள் நீங்கி சுபிட்சம் ஏற்படும் காலம்.

கன்னி ராசிக்கு ரோகச் சனியால் தடைகள் விலகும் காலம்.

விருச்சிக ராசிக்கு பஞ்சம சனியால் புதுமைகள் நிறைந்த காலம்.

தனுசு ராசிக்கு சகாய சனியால் செய்யும் முயற்சிகளில் வெற்றி அடையும் காலம்.

ஏழரை சனி எந்தெந்த ராசிக்கு?

ஒருவரின் ஜாதக கட்டத்தில் ஜெனன சந்திரன் இருக்கும் ராசிக்கு 12, 1, 2 ஆகிய வீடுகளில் சனிபகவான் கடந்து செல்லும் காலமானது ஏழரை சனி என்று அழைக்கப்படுகின்றது. இந்த ஆண்டு நடைபெறும் சனிப்பெயர்ச்சியால் ஏழரை சனியின் தாக்கத்திற்கு உட்படும் ராசிகள் பின்வருமாறு..

மகர ராசிக்கு ஜென்ம சனி முடிந்து பாதச்சனி ஆரம்பிக்கிறது.

கும்ப ராசிக்கு விரய சனி முடிந்து ஜென்ம சனி ஆரம்பிக்கிறது.

மீன ராசிக்கு லாப சனி முடிந்து விரைய சனி ஆரம்பிக்கிறது.

ஏழரை சனி காலத்தில் சனிபகவான் விரய சனி, ஜென்ம சனி, பாதச்சனி என்ற நிலைகளில் இருந்து அந்தந்த ராசிகளுக்கு புதுவிதமான அனுபவத்தையும், படிப்பினையும் அளிப்பார்.

அர்த்தாஷ்டம சனி, கண்டச்சனி, அஷ்டம சனி காலத்தில் பலவிதமான இன்னல்களை உருவாக்கினாலும் கடைசியில் நன்மையான பலன்களை கொடுப்பார். மனதில் எதையும் ஏற்றுக்கொள்ளும் மனப்பக்குவம் மற்றும் புதுவிதமான புரிதல்களையும் உருவாக்குவார்.

கிரகங்களின் மூலம் உண்டாகும் சுப பலன்களை அவரவர் ஜென்ம ஜாதகத்தில் உள்ள திசாபுத்திக்கு ஏற்ப நவகிரகங்கள் அளிக்கும். அதாவது திசாபுத்தியானது உங்களுக்கு சாதகமாக இருந்தால், அதிகளவு நன்மையையும், குறைந்தளவு தீமையையும் தரும் என்று ஜோதிட சாஸ்திரம் கூறுகிறது.