அண்ணா தொழிற்சங்கத்தைச் சேர்ந்த நலிந்த தொழிலாளர்கள் 92 பேருக்கு ரூ.23 லட்சம்; ஜெயலலிதா வழங்கினார்

மே தினத்தை முன்னிட்டு ஒவ்வொரு ஆண்டும், அ.தி.மு.க. அண்ணா தொழிற்சங்கப் பேரவையில் உறுப்பினர்களாக உள்ள நலிந்த தொழிலாளர்களுக்கு தலா ரூ.25,000 வீதம் குடும்ப நல நிதியுதவி வழங்கப்பட்டு வருகிறது.

 

 அதனடிப்படையில், இந்த ஆண்டும், நிதியுதவி வழங்கும் நிகழ்ச்சி நேற்று நடந்தது. அ.தி.மு.க. பொதுச் செயலாளர், முதல்- அமைச்சர் ஜெயலலிதா நேற்று மதியம் 2 மணிக்கு தலைமை கழகத்திற்கு வருகை தந்து, அண்ணா தொழிற்சங்கத்தைச் சேர்ந்த அறிவிக்கப்பட்ட 92 நலிந்த தொழிலாளர்களுக்குத் தலா ரூ.25 ஆயிரம் வீதம் மொத்தம் ரூ.23 லட்சம் குடும்ப நல நிதியுதவியாக வழங்கினார். 

 

 அதேபோல், அரசியல் காழ்ப்புணர்ச்சி காரணமாக அரசியல் எதிரிகளாலும், சமூக விரோதிகளாலும் படுகொலை செய்யப்பட்டு மரணமடைந்த மற்றும் கழகப் பணியாற்றும் போது விபத்துக்குள்ளாகி அகால மரணமடைந்த 6 கழக தொண்டர்களின் குடும்பங்களுக்குத் தலா ஒரு லட்சம் ரூபாய் வீதம் 6 லட்சம் ரூபாயை குடும்ப நல நிதியுதவியாக வழங்கினார்.

 

தங்களுடைய குடும்ப சூழ்நிலையை அறிந்து நிதியுதவி வழங்கிய கழகப் பொதுச் செயலாளர், முதல்-அமைச்சர் ஜெயலலிதாவுக்கு, நிதியுதவியை பெற்றுக்கொண்ட தொழிலாளர்களும், அவர்களது குடும்பத்தினரும், அகால மரணமடைந்த தொண்டர்களின் குடும்பத்தினரும் தங்களது நெஞ்சம் நிறைந்த நன்றியினை தெரிவித்துக்கொண்டனர்.  

 

 இந்த நிகழ்ச்சியின் போது, அண்ணா தொழிற்சங்கப் பேரவைச் செயலாளர் ஆர்.சின்னசாமி எம்.எல்.ஏ.வும், நிர்வாகிகளும் உடனிருந்தனர். முன்னதாக ஜெயலலிதாவுக்கு தலைமைக் கழக நிர்வாகிகள் மதுசூதனன், ஓ.பன்னீர்செல்வம், கே.ஏ.செங்கோட்டையன் உள்ளிட்ட அமைச்சர்கள், சுலோச்சனா சம்பத், சைதை துரைசாமி, மீனவரணி துணை செயலாளர் டி.ரமேஷ், சிறுபான்மை பிரிவு நிர்வாகிகள் பஹிம், வீரை கறீம், அமினுத்தீன் உள்பட பலர் வரவேற்றனர். அண்ணா தொழிற்சங்கத்தைச் சேர்ந்த பெருந்திரளான தொழிலாளர்கள், தொழிற்சங்கக் கொடிகளையும், வரவேற்பு பதாகைகளையும் கைகளில் ஏந்தி சிறப்பான வரவேற்பு அளித்தனர்.